ႁဝ်းၶႃႈလႆႈႁၼ် ၵူၼ်းဢၼ်ထုၵ်ႇဢဝ်ငိုၼ်းၵႂႃႇ ၼႂ်းဢၵွင်ႉ KBZBank လႄႈ KBZPay လူၺ်ႈဢမ်ႇလူဝ်ႇ မၢႆလပ်ႉမၼ်းၼႆ လႄႈ ၶႃႈၶဝ် ၶဝ်ႈၸႂ်သေ လႆႈလဵပ်ႈႁဵၼ်းဝႆႉ ၸွမ်းၼင်ႇတႂ်ႈၼႆႉ။

တွၼ်ႈဢွၼ်တၢင်း

တႃႇတေလၵ်ႉငိုၼ်းလႆႈ ၼႂ်းဢၵွင်ႉၼၼ်ႉ တေလႆႈမီးလွင်ႈတၢင်းၵွၼ်ႇ ၸင်ႇတေဢဝ်လႆႈယဝ်ႉ။ ဢွၼ်တၢင်း တေမီးလိၵ်ႈၶေႃႈၵႂၢမ်း SMS သူင်ႇမႃးတီႈမၢႆၽူင်းၸဝ်ႈၵဝ်ႇ ၸႂ်ႉၸိုဝ်ႈ KBZBank သေ လၢတ်ႈဝႃႈ ဢၵွင်ႉႁဝ်း မီးၵူၼ်းလၵ်ႉၶဝ်ၼႆလႄႈ ႁႂ်ႈၵႂႃႇတီႈ https://kbzsecurity-mm.cc မိူဝ်ႈလဵဝ်လႅၵ်ႈပဵၼ် https://kbzbank.vip ၼႆယဝ်ႉ။

ႁၢင်ႈၶေႃႈၵႂၢမ်းဢၼ်သူင်ႇမႃး

သင်ဝႃႈ ၸဝ်ႈၵဝ်ႇ ၼဵၵ်းၶဝ်ႈၵႂႃႇသေ သႂ်ႇပၼ် ၶေႃႈမုၼ်း Bank ပၢၼ်ႇၸဝ်ႈၵဝ်ႇၸိုင် လႆႈဝႃႈ ၶေႃႈမုၼ်းၼၼ်ႉ ၵႂႃႇထိုင်တီႈ ၵူၼ်းဢၼ်တေလၵ်ႉၼၼ်ႉယဝ်ႉ ၶဝ်ၶဝ်ႈၵႂႃႇၼႂ်းဢၵွင်ႉႁဝ်းလႆႈသေ သူင်ႇငိုၼ်းဢွၵ်ႇ ၼႂ်းဢၵွင်ႉႁဝ်းၵေႃႈ လႆႈၵမ်းလဵဝ်ယဝ်ႉ။ မၢႆတွင်း => ၼႆႉဢမ်ႇၸႂ်ႈ KBZPay ပဵꧣ်တႃႇလႅၼ်ဢဝ် KBZBanking App ။

လဵပ်ႈႁဵၼ်းလွင်ႈ Technical Analyze

ၼႆႉပဵꧣ်ႁၢင်ႈၼႃႈဝႅပ်ႉ ဢၼ်ပွမ် KBZBank လၢတ်ႈလွင်ႈ ႁူမ်ႇလူမ်ႈဢၵွင်ႉႁဝ်း။ ပေႃးမၼ်းမီးပၼ်ႁႃၸိုင် ႁႂ်ႈၶဝ်ႈၵႂႃႇ သႂ်ႇၸိုဝ်ႈ မၢႆၽူင်း လႄႈ လွင်ႈတၢင်း ဢၼ်ၵွင်ႉႁဝ်းပဵၼ်ၼႆယဝ်ႉ။ တူၺ်းႁၢင်ႈတီႈတႂ်ႈၼႆႉ။

ႁၢင်ႈၼႆႉပဵၼ် တီႈတေလႆႈသႂ်ႇ ၶေႃႈမုၼ်းသုၼ်တူဝ်ႁဝ်းယဝ်ႉ။ သင်ႇသႂ်ႇပၼ်သေ ၼဵၵ်း Send ၸိုင် ၶေႃႈမုၼ်းဢၼ်သႂ်ႇ ပၼ်ၼၼ်ႉ တေၵႂႃႇၵဵပ်းဝႆႉတီႈ https://kbzbank.vip/x/save-user ၼႆၶႃႈဢေႃႈ။ ၼႆႉမၢႆထိုင်ဝႃႈ ပေႃးႁူႉၸိုဝ်ႈလႄႈ မၢႆၽူင်းၵေႃႈ ၶိုၼ်းသိုပ်ႇ သူင်ႇလိၵ်ႈမႃးၸူးသေလွင်ႈလွင်ႈ လႅၼ်ႁႂ်ႈႁဝ်းၶဝ်ႈၵႂႃႇၸွမ်းလၢႆးၶဝ်သေ လၵ်ႉငိုၼ်းႁဝ်းၼၼ်ႉယဝ်ႉ။

Server လႄႈ security ဢၼ်ၶဝ်ၸႂ်ႉ

ၶဝ်ၸႂ်ႉဝႆႉ Server တီႈလႂ်တေႉတေႉၼႆၼၼ်ႉ ႁႃယၢပ်ႇဝႆႉလႄႈ ၵွပ်ႈၶဝ်ဢဝ် Cloudflare သေ ႁႄႉႁၢမ်ႈလပ်ႉဝႆႉယဝ်ႉ။ ၵူၺ်းၶႃႈၶဝ် ၶတ်းၸႂ်ႁႃတူၺ်းတေႉ မိူဝ်ႈဝၼ်းတီႈ 27/07/2023 ၼၼ်ႉ ၸႂ်ႉ IP 52.221.119.144 ဢၼ်ၼႆႉ ပဵၼ် server တီႈ Amazon AWS ဝႆႉ။

တီႈ NS သမ်ႉၸႂ်ႉဝႆႉ ns1.gname.net, ns2.gname.net လႄႈ gname.net ၼႆႉ ပဵၼ်ဢွင်ႈတီႈ ၶၢႆ domain လႄႈ hosting ဝႆႉ။ ၽၢင်ႁၢင်ႈမိူၼ်ၼင်ႇတႂ်ႈၼႆႉ။

ဝႅပ်ႉ gname.net ၼႆႉ ၸႂ်ႉဝႆႉ Alibaba cloud လႄႈ ၽၢင်ႁၢင်ႈတူၺ်းလႆႈတီႈတႂ်ႈၼႆႉ။

မၢႆထိုင်ဝႃႈ ၵူၼ်းဢၼ်ႁဵတ်း ဝႅပ်ႉပွမ် kbzsecurity-mm.cc လႄႈ kbzbank.vip ၼႆႉ ပဵၼ်ၶႄႇ။ ဢၼ်လႅၼ်ဢဝ် ငိုၼ်းႁဝ်းၼႂ်း KBZBanking ၼၼ်ႉၵေႃႈ ၼႄႉၼွၼ်းဝႃႈပဵၼ်ၶႄႇ။ ၸုမ်းၶႄႇ ဢၼ်လႅၼ်ငိုၼ်းပိူၼ်ႈယူႇၸွမ်း လႅၼ်လိၼ် တႆး-ထႆး၊ ယၢင်း-ထႆး လႄႈ တႆး-ၶႄႇ ၸိူဝ်းၼႆႉ ၶိုၼ်းဝၢႆႇမႃး ႁႃလႅၼ်ၶိုၼ်း ၵူၼ်းမိူင်းမၢၼ်ႈယဝ်ႉ။ မိူင်းမၢၼ်ႈပၼ် တီႈယူႇ၊ ပၼ်ၾႆး၊ ပၼ် internet လႄႈ ၵူၼ်းႁဵတ်းၵၢၼ်။ သမ်ႉၶိုၼ်းမႃးလႅၼ်ၵူၼ်းမိူင်းမၢၼ်ႈၶိုၼ်းၼႆ ယူႇတီႈၶႃႈၶဝ် ၽူႈလဵပ်ႈႁဵၼ်း လွင်ႈႁူမ်ႇလူမ်ႈတေႉ တိုၼ်းသၢၼ်ၶတ်းတေႉတေႉဝႃႈဝႃႈယူႇယဝ်ႉ။

လိုၼ်းသုတ်း ယွၼ်းႁႂ်ႈၾၢင်ႉၵၼ်ၵူႈၵေႃႉလႄႈ လွတ်ႈၽေးလွင်ႈပိူၼ်ႈလၵ်ႉလႅၼ်ငိုၼ်းၵၼ်သေၵမ်း ၼပ်ႉယမ်ယႂ်ႇၼမ်သေ

တုမ်ႇၾႃႉ

ၶႅပ်းႁၢင်ႈ => ၶေႃႈၵႂၢမ်းၼၼ်ႉဢဝ်မႃးၼိူဝ် FB