ၵွပ်ႈသင် Bitcoin ၶိုၵ်ႉၶႅမ်ႉလိူဝ်သေ Cryptocurrency တၢင်ႇဢၼ် တင်းမူတ်း?
Bitcoin ပဵၼ်ႈငဝ်ႈတိုၼ်း cryptocurrency တင်းမူတ်းယဝ်ႉ။ ဝၢႆးသေမၼ်းဢွၵ်ႇမႃးမိူဝ်ႈပီ 2009 ယဝ်ႉ altcoins (crypto ဢၼ်ဢမ်ႇၸႂ်ႈ Bitcoin) လႄႈ DeFi project (Decentralized Finance) တင်းၼမ်တင်းလၢႆၵေႃႈ ၵိူတ်ႇဢွၵ်ႇမႃးၸွမ်း တေႇၸဵမ် Dogecoin ထိုင် Eth ၸိူဝ်းၼႆႉ။ ယွၼ်ႉၼၼ် altcoin တင်းၼမ်ဢၼ်ဢမ်ႇၸႂ်ႈ Bitcoin ၸိူဝ်းၼၼ်ႉၵေႃႈ ၵိၼ်လွၵ်းၵၢတ်ႇဝႆႉၼမ်ယူႇ။
ၵူၼ်းတင်းၼမ် လႆႈၸႂ်လွင်ႈႁဵတ်းသၢင်ႈလၢႆလၢႆမဵဝ်း လႄႈ လွင်ႈတၢင်းလၢႆးၸႂ်ႉတိုဝ်းမၼ်း ဢၼ်မီးတီႈတူဝ် altcoin လၢႆလၢႆတူဝ် လိူဝ်သေဢၼ် Bitcoin ႁဵတ်းလႆႈၼၼ်ႉယူႇ။ project ၶွင် altcoin မႂ်ႇလၢႆလၢႆဢၼ် သၢင်ႈ ၶိုၼ်ႈမႃးၼိူဝ်ပိုၼ်ႉထၢၼ် Ethereum ဢမ်ႇၼၼ် fork ဢဝ်တီႈ crypto ဢၼ်မီးလွင်ႈသုၼ်ႇတူဝ်သုင်၊ ႁပ်ႉႁွင်းၵၢၼ်ႁပ်ႉသူင်ႇငိုၼ်းလႆႈၼမ်၊ ၸႂ်ႉလႆႈပႃး smart contract တႄႇၵႂႃႇၸိူဝ်းၼႆႉ။ ၸင်ႇလႆႈမီးလွင်ႈတၢင်း တႃႇလိူၵ်ႈ crypto တၢင်ႇဢၼ် ဢၼ်ဢမ်ႇၸႂ်ႈ Bitcoin ယွၼ်ႉဝႃႈ Bitcoin ပႆႇတဵမ်ထူၼ်ႈလီၼႆလႄႈ လွင်ႈၶိုပ်ႈၼႃႈမၼ်းၵေႃႈတိုၵ်ႉမီးၵႆႇယူႇ ၼႆယဝ်ႉ။
ၸႂ်ႈယဝ်ႉ ၼမ်ႉၵတ်ႉ ဢၼ်ယၢပ်ႇတႃႇလႅၵ်ႈလၢႆႈၼႆႉယဝ်ႉ ဢၼ်ႁဵတ်းႁႂ်ႈ Bitcoin တိူဝ်းၶႅမ်ႉ လႄႈ မၼ်းပဵၼ်ၽွၼ်းယွၼ်ႈ ဢၼ်ယိုင်ႈယႂ်ႇ ဢၼ်လုၵ်ႉတီႈ Bitcoin Network မႃး။
Network effects ပဵၼ် ၾိင်ႈပိူင်ဢၼ်လၢၵ်ႇလၢႆး ယွၼ်ႉဝႃႈ ၵူၼ်းၸႂ်ႉ တိုဝ်းမႂ်ႇၼၼ်ႉ ဢမ်ႇလႆႈႁုၼ်ႈမုၼ်းပဵၼ်သဵၼ်ႈသိုဝ်ႈသိုဝ်ႈဝႆႉ ၵူၺ်းပဵၼ်ၽၢင် ႁၢင်ႈ exponential ၵူၺ်း။ ဝူၼ်ႉတူၺ်းလၢႆးၼႆႉ – သင် Nick လႄႈ Alex ပဵၼ်ပွတ်းဢွၼ်ႇတွၼ်ႈၼိုင်ႈၼႂ်း network ၼႆ ၶႃတေၵပ်းသိုပ်ႇၵၼ်ဝႆႉ။ သင် Jeremy မႃးၶဝ်ႈႁူမ်ႈၸွမ်း မိူၼ်ၼင်ႇဢၼ်ၼႄဝႆႉ ၼႂ်းၶႅပ်းႁၢင်ႈၼၼ်ႉၸိုင် ၶဝ်သၢမ်ၵေႃႉတေၵွင်ႉသၢၼ်ၵၼ်ဝႆႉတင်းမူတ်း။ ၵမ်းၼႆႉ သင်ဢဝ် Nicole မႃးၶဝ်ႈ ႁူမ်ႈပႃးၼႆ တင်းမူတ်းတေမီး လွင်ႉၵွင်ႉသၢၼ်ၵၼ် ပဵၼ် 6 ဢၼ်။ သင် တူၺ်းၼႂ်းၶႅပ်းႁၢင်ႈ တေလႆႈႁၼ်ယူႇဝႃႈ သင်ႁဝ်းဢဝ်ၵူၼ်းမႃးႁူမ်ႈၼႂ်း network တိၵ်းတိၵ်း မၼ်းတေပဵၼ်ႁိုဝ်ၼႆ။
ၼႆႉယဝ်ႉ ဢၼ်ႁဵတ်းႁႂ်ႈ Facebook, Amazon လႄႈ Bitcoin ပဵၼ်ၽူႈ ၼမ်း ၼႂ်းတူင်ႇဝူင်းၽႂ်မၼ်းယဝ်ႉ။ Facebook ပဵၼ်ၶမ်ႇပၼီႇလူင် ဢၼ်ယႂ်ႇလိူဝ်သေပိူၼ်ႈ လႄႈ ပဵၼ် social networking ဢၼ်ႁဝ်းၸႂ်ႉတိုဝ်းယူႇတေႃႈလဵဝ်ၼၼ်ႉ မိူၼ်ႈဢွၼ်တၢင်း မၼ်းယၢမ်ႈပဵၼ် ၽူႈၶေႉၶဵင်ႇဢၼ်ၼိုင်ႈ ၼႂ်း တူင်ႇဝူင်းဢၼ်ၶိုၼ်ႈယႂ်ႇ ဢွၼ်တၢင်းမၼ်းတေမႃးပဵၼ်ၽူႈၼမ်း MySpace။ မၼ်းယၢမ်ႈပဵၼ်ဝႅပ်ႉသၢႆႉဢွၼ်ႇလၢႆး မၢႆၼိုင်ႈ။ ဝၢႆးသေ Facebook ၶိုၼ်ႈယႂ်ႇမႃး မၼ်းပၵ်းၸႂ်သၢင်ႈ App တႃႇၸႂ်ႉၼႂ်းၽူၼ်းသေ ႁဵတ်းႁႂ်ႈမၼ်းလီလိူဝ်သေ MySpace လၢႆပုၼ်ႈ။ လၢတ်ႈလႆႈဝႃႈပဵၼ်ၶူဝ်းဢၼ်လီလိူဝ်သေ 10 ပုၼ်ႈၼႆလႄႈ ၼႆႉၸင်ႇႁဵတ်းႁႂ်ႈ Facebook ၶိုၼ်ႈၸိုဝ်ႈဝႃႈပဵၼ် ႁူဝ်ၼႃႈ social media တင်းမူတ်းၼႆယူႇ။ ဢိင်ၼိူဝ် ပၢႆးဝူၼ်ႉဢၼ်ႁွင်ႉဝႃႈ ပိူင် 10 ပုၼ်ႈ ၼၼ်ႉသေ ၽူႈၶေႉၶဵင်ႇ တၵ်းတေလႆႈႁဵတ်းသၢင်ႈႁႂ်ႈလီလိူဝ်သေပိူၼ်ႈ တႃႇဢွင်ႇပေႉ တွၼ်ႈတႃႇတေပဵၼ်ၸဝ်ႈလွၵ်းၵၢတ်ႇၵေႃႉမႂ်ႇ။
ၼႂ်းလူၵ်ႈၶွင် cryptos ၵေႃႈ တေႃႈၼင်ႇၼၼ် တေႃႈလဵဝ် ပႆႇမီး altcoin ဢၼ်လႂ် ဢၼ်လီလိူဝ်သေ Bitcoin ပဵၼ် 10 ပုၼ်ႈ။ ယွၼ်ႉဝႃႈ လွင်ႈႁူမ်ႇလူမ်ႈ လႄႈ network ၶွင် Bitcoin ၼၼ်ႉ ၵႅၼ်ႇၶႅင်လိူဝ်သေပိူၼ်ႈဝႆႉလႄႈ ၸင်ႇ ႁဵတ်းႁႂ်ႈ node တင်းလၢႆ မႃးၶဝ်ႈႁူမ်ႈသေ ႁဵတ်းႁႂ်ႈ Bitcoin ႁူမ်ႇလူမ်ႈမႃးလိူဝ်သေၵဝ်ႇလႄႈ တႃႇႁႂ်ႈ cryptos မႂ်ႇမႂ်ႇမႃးတႅၼ်းတီႈ Bitcoin ၼၼ်ႉ ယင်းပႆႇႁၼ်သဵၼ်ႈတၢင်းမၼ်းၵွၼ်ႇ။
Bitcoin ဢမ်ႇတၢပ်ႈလူဝ်ႇမီး လွင်ႈပိုၼ်ၶၢဝ်ႇ
လွင်ႈဢၼ်ယွင်ႇဝႃႈလိူဝ်သေပိူၼ်ႈသုတ်းၼၼ်ႉ Bitcoin ဢမ်ႇလူဝ်ႇပိုၼ် ၶၢဝ်ႇ ဢမ်ႇလူဝ်ႇမီး marketing သင်သေ မၼ်းလႆႈယုၵ်ႉၸၼ်ႉ ၶိုၼ်ႈမႃးပဵၼ် ၸဝ်ႈလွၵ်းၵၢတ်ႇႁင်းၵွၺ်းမၼ်း။ ၵူၺ်း altcoins တင်းလၢႆတႄႉ ယင်းလူဝ်ႇ လွင်ႈယုၵ်ႉမုၼ်း တႃႇၶၢႆဢွၵ်ႇ လႄႈ တႃႇလႆႈလွင်ႈႁပ်ႉႁွင်းၼႂ်းလွၵ်းၵၢတ်ႇယူႇ။ တူၺ်းႁူဝ်ၼပ်ႉ ၽူႈမီးၸိုဝ်ႈသဵင်လိုဝ်းလင် ဢၼ်ၶဝ်ပိုၼ်ၶၢဝ်ႇပၼ် altcoins ၸိူဝ်းၼၼ်ႉ မိူၼ်ၼင်ႇ Tron တူၺ်းလႄႈ ၸဝ်ႈၵဝ်ႇတေယုမ်ႇယမ်မႃးယူႇ ဝႃႈ cryptos ၸိူဝ်းၼႆႉ မီးသုၼ်ၵၢင်ၵုမ်းထိင်းဝႆႉတၢၼ်ႇလႂ် ၼႆ။
ပၢႆးဝူၼ်ႉ တႃႇပဵၼ် ၽူႈၼမ်းလွၵ်းၵၢတ်ႇ လူၺ်ႈ network effect ၼၼ်ႉယဝ်ႉ ဢၼ်ႁဵတ်းႁႂ်ႈၽူႈတႅမ်ႈ မၼ်ႈၸႂ်ၼိူဝ် လွင်ႈဢွင်ႇမၢၼ် ၶွင် Bitcoin ။ ႁဝ်း ၸၢင်ႈလဵပ်ႈႁဵၼ်းလွင်ႈထႅၵ်ႇၼူဝ်ႇလေႃႇၵျီႇ ဢၼ်သုၵ်ႉသၵ်ႉယုင်ႈယၢင်ႈလူင်လႆႈ လႄႈ ဢုပ်ႇဢူဝ်းၶေႉၼမ်ႉၵႂၢမ်း လွင်ႈ tokenomics (ပၢႆးသၢႆႈၽၢႆႇ token) လႆႈတင်းဝၼ်းသေတႃႉ မၼ်းၵေႃႈဢမ်ႇမီးတီႈပွင်ႇသင် ယွၼ်ႉဝႃႈ Bitcoin ပေႉပုၼ်ႈပိူၼ်ႈဝႆႉတင်းမူတ်း လူၺ်ႈ network ဢၼ်ပဵၼ်ၽူႈၼမ်းသေ ႁဵတ်းႁႂ်ႈမၼ်းသိုပ်ႇယိုင်ႈယႂ်ႇၵႂႃႇ။
ETH, Doge လႄႈ cryptocurrency တင်းလၢႆ တေဢမ်ႇၸၢင်ႈၶၢမ်ႈပူၼ်ႉ Bitcoin လႆႈ (ပိၵ်ႉသမ်ႉဝႃႈ ပိူၼ်ႈတေၶတ်းၸႂ်လၢတ်ႈၼႄၸိူင်ႉႁိုဝ်ၵေႃႈယဝ်ႉ) မၼ်းဢမ်ႇလမ်ႇလွင်ႈ ဝႃႈၶဝ်လၢတ်ႈဝႃႈ ၶဝ်ၶိုၼ်ႈယႂ်ႇမွၵ်ႈၵႃႈႁိုဝ်ၵေႃႈယဝ်ႉ။ သင်ဝႃႈ altcoins ၸိူဝ်းၼႆႉ ပႆႇၶေႉၶဵင်ႇ ၶၢမ်ႈပူၼ်ႉ လွင်ႈၵႅၼ်ႇၶႅင် ဢၼ်ႁၢမ်းသုၼ်ၵၢင် ၶွင် Bitcoin လႄႈ လွင်ႈႁူမ်ႇလူမ်ႈမၼ်းၼၼ်ႉ ၶဝ်တေမႃးၶေႉၶဵင်ႇ ႁိမ်ဢဝ် လွင်ႈပဵၼ်ၽူႈၼမ်းၶွင် Bitcoin လႆႈၸိူင်ႉႁိုဝ်?
ၽူႈတႅမ်ႈ – ၵႅမ်မိူင်း