မႂ်ႇသုင်ၶႃႈ မိူဝ်ႈၼႆႉ ၶႃႈတေမႃးသပ်းလႅင်းပၼ် ႁူဝ်ယွႆႈ ဢၼ်ငိုၼ်းႁၢႆ ဢမ်ႇၼၼ် ထုၵ်ႇပိူၼ်ႈလၵ်ႉဢဝ်ၵႂႃႇမူတ်း တီႈမိူင်းထႆးၼႂ်းပၢၼ်ႇၼၼ်ႉ ႁဵတ်းႁိုဝ်ပဵၼ်။ ယူႇယူႇသေငိုၼ်းႁဵတ်းႁိုဝ်ငိုၼ်းႁၢႆ ယဝ်ႉၵေႃႈ ၽူႈလၵ်ႉႁဵတ်းႁိုဝ်ဢဝ်ၵႂႃႇလႆႈ။ ၾူၼ်းႁဝ်းၵေႃႈ ၶဝ်ဢမ်ႇလႆႈမႃးယိပ်းတူၺ်း မၢႆလပ်ႉမၼ်း ဢၼ်ႁဝ်းသႂ်ႇဝႆႉၼၼ်ႉၵေႃႈ ၶဝ်ႁဵတ်းႁိုဝ်ႁူႉ ၸဵမ်ၸိူဝ်းၼႆ သိုပ်ႇလူဢၢၼ်ႇ တူၺ်းႁူဝ်ယွႆႈမၼ်းတီႈတႂ်ႈၼႆႉ။

ၾူၼ်း Android

ဢၼ်ပဵၼ်ယူႇၵမ်ႈၼမ်ၼႆႉ တေပဵၼ်တီႈၽူႈဢၼ်ၸႂ်ႉ ၾူၼ်း Android၊ ၵွပ်ႈဝႃႈ မႅင်း Spyware ၊ Trojan ၊ Malware ၸိူဝ်းၼႆႉ ၶဝ်ႈမႃးလႆႈငၢႆႈငၢႆႈၼၼ်ႉယဝ်ႉ။ iPhone တေႉ ပေႃးဢမ်ႇၸႂ်ႈ မႅင်းဢၼ်ၸိုဝ်ႈဝႃႈ Pegasus ၼႆ တႃႇတေ ယႃႉၶဝ်ႈလႆႈၼၼ်ႉ ဢမ်ႇငၢႆႈမိူၼ်ၼင်ႇ Android။ Android OS ၼႆႉ ဢဝ် ၽႃႇသႃႇ Java သေ တႅမ်ႈဝႆႉလႄႈ ၽူႈၸိူဝ်းဢၼ် ၵတ်ႉၶႅၼ်ႇၽၢႆႇ Java Programming ၼၼ်ႉ တိုၼ်းတႅမ်ႈလႆႈမႅင်း တႃႇၸႂ်ႉလႆႈ ၼိူဝ်ၾူၼ်း Android လႆႈလီယူႇယဝ်ႉ။

လႅၼ်ႁႂ်ႈႁဝ်းသႂ်ႇ App မီးမႅင်း

ယူႇယူႇသေ ၾူၼ်းၸဝ်ႈၵဝ်ႇ ထုၵ်ႇမႅင်းၶဝ်ႈႁင်းၵူၺ်းတေႉ ဢမ်ႇၸႂ်ႈ၊ ပေႃးၸဝ်ႈၵဝ်ႇဢမ်ႇလူင်း App ဢၼ်ပႃးမႅင်းၼႆ မႅင်းၼၼ်ႉမၼ်းဢမ်ႇၶဝ်ႈလႆႈႁင်းၵူၺ်းမၼ်း။ ၼင်ႇႁိုဝ်ႁဝ်းတေလူင်းသႂ်ႇ App ဢၼ်မီးမႅင်းၼၼ်ႉ ၽူႈဢၼ်လႅၼ်ၶဝ်တေႁူၺ်းႁႂ်ႈႁဝ်းလူင်းသႂ်ႇဢဝ်ယဝ်ႉ။ ၵမ်ႈၼမ် ၶဝ်တေသူင်ႇလိၵ်ႈမႃး တင်းၶေႃႈၵႂၢမ်း SMS ဝႃႈ ႁဝ်းမီးသုၼ်ႇ ယိမ်ငိုၼ်းၼမ်ထိုင် 100,000 ဝၢတ်ႇ ဢမ်ႇၼၼ် ႁဝ်းလူဝ်ႇသႂ်ႇ ၽႃးသီ ၶွၼ်ႇၵႃး ၼႆလႄႈ ႁႂ်ႈၵမ်းသိုပ်ႇၶဝ်တင်း Line ယဝ်ႉ။ ပေႃးလၢတ်ႈတေႃႇ တင်း Line ယဝ်ႉသေ ၶဝ်တေႁူၺ်းႁႂ်ႈႁဝ်း လူင်းသႂ်ႇ App ဢၼ်ပႃးမႅင်းၼၼ်ႉယဝ်ႉ။

ႁူဝ်ယွႆႈ App မႅင်း ႁဵတ်းၵၢၼ်

ဝၢႆးသေ ႁဝ်းၸၼ်လူင်းဢႅပ်ႉ ဢၼ်မီးမႅင်းၼၼ်ႉယဝ်ႉ မိူဝ်ႈတေလူင်းသႂ်ႇၼႂ်းၾူၼ်းၸဝ်ႈၵဝ်ႇၼၼ်ႉ မၼ်းတေလၢတ်ႈဝႃႈ မၼ်းယွၼ်းၶႂၢင်ႉတေၸႂ်ႉသင်လၢႆလၢႆ။ သင်ဝႃႈႁဝ်းဢၢၼ်ႇလီလီၸိုင် ႁဝ်းတေႁူႉယူႇ၊ ၵူၺ်းၵႃႈ ၵမ်ႈၼမ်တေဢမ်ႇတၼ်းတူၺ်း ထႅင်ႈလွင်ႈတေႉ ၵူၼ်းဢၼ်လႅၼ်ၼၼ်ႉ တေၼႅၼ်ႈႁဝ်း ႁႂ်ႈႁဝ်းၵႂင်သေ ၼႅတ်ႈလူင်းသႂ်ႇယဝ်ႉ။

ဢႅပ်ႉၼၼ်ႉ ႁၢင်ႈမၼ်းတေမိူၼ် ဢႅပ်ႉဢၼ်တေႉတေႉၼၼ်ႉယဝ်ႉ။ မိူၼ်ၼင်ႇ ၽူႈလၵ်ႉၼၼ်ႉ တေပွမ်ဢႅပ်ႉ DSI, DES, Lazada လႄႈ MOC ၸဵမ်ၸိူဝ်းၼႆႉ မိူၼ်ဢၼ်တေႉမၼ်းလီလီယဝ်ႉ။ ၵူၺ်းၵႃႈ ဢၼ်ၶႃႈႁႃႁၼ်သေ ထတ်းတူၺ်းတေႉတေပဵၼ်ဢႅပ်ႉ MOC ဢၼ်ၵဵဝ်ႇၵပ်း လွင်ႈၵၢၼ်မၢၵ်ႈမီး။ ဝႅပ်ႉသၢႆႉပွမ်ၼၼ်ႉ ၶဝ်ႈတူၺ်းလႆႈတီႈၼႆႈ ။

App မႅင်းၼၼ်ႉ ဢဝ်လႆႈတီႈၼႆႈ ၾၢင်ႉ။ ။ ယႃႇလႃႈလီႈသႂ်ႇၶႃႈၼႃႈ ၵူဝ်ငိုၼ်းသူၸဝ်ႈႁၢႆမူတ်း။

ဢႅပ်ႉဢၼ်ၼႆႉ ပေႃးၸၼ်မႃးယဝ်ႉ ဢဝ်ၵႂႃႇထတ်းတူၺ်း တီႈ Virus Total ၼႆ တေႁၼ်မၼ်းပဵၼ်မႅင်း ယူႇယဝ်ႉ။ တူၺ်းလႆႈတီႈၼႆႈၶႃႈ

ၸိုဝ်ႈ Certificate မၼ်းတေႉ ပဵၼ် CN:lu ၼႆ လမ်းဝႃႈ ၵူၼ်းတႅမ်ႈဢႅပ်ႉၼၼ်ႉ ပဵၼ်ၶႄႇၼႆယဝ်ႉ။

ဢႅပ်ႉၼၼ်ႉ ယွၼ်းၶႂၢင်ႉတႃႇ တူၺ်းၶေႃႈၵႂၢမ်း SMS ၊ တႃႇလပ်ႉၼႃႈၸေႃး Screen ၾူၼ်းၸဝ်ႈၵဝ်ႇ ပဵၼ်တၢင်ႇဢၼ် ဢၼ်ဝႃႈ Overlayer လႄႈ ဢတ်းၼႃႈၸေႃး ပဵၼ်ဝီးတီးဢူဝ်း ၸႂ်ႉ Foreground Service သေ ႁဵတ်းၵၢၼ်ၸိူဝ်းၼႆႉယဝ်ႉ။

ၸိုဝ်ႈဢႅပ်ႉ တေႉဝႃႈ MOC သေ PackageName မၼ်းတေႉၸိုဝ်ႈဝႃႈ com.myscript.nebo ၼႆ ၵူၺ်းၼႂ်း PackageName မၼ်းတေႉတေႉ ဝႃႈ com.xingchat.android.activity.MainActivity ဝႃႈၼႆယဝ်ႉ။

ဢၼ်ၼႄမႃးတင်းၼိူဝ်ၸိူဝ်းၼႆႉ ပဵၼ်ဝႅပ်ႉၶဝ်လႄႈ ဢႅပ်ႉၶဝ်၊ ဢႅပ်ႉလၵ်ႉငိုၼ်းၼၼ်ႉ ႁဵတ်းႁိုဝ်ႁဵတ်းၵၢၼ်ၼႆ သိုပ်ႇဢၢၼ်ႇထႅင်ႈတီႈတႂ်ႈၼႆႉ။

ပေႃးလူင်းသႂ်ႇယဝ်ႉ တေပိုတ်ႇမႃးတေပဵၼ် SplashActivity ဢွၼ်တၢင်း၊ ပေႃးပႆႇလႆႈ ၶဝ်ႈ Login ဝႆႉၼႆ ၶဝ်တေႁႂ်ႈၶဝ်ႈ Login ၵွၼ်ႇ ပေႃးၼၼ် မၼ်းသူင်ႇၵႂႃႇတီႈ LoginActivity ယဝ်ႉ။ ပေႃးသႂ်ႇ ၶေႃႈမုၼ်း မိူၼ်ၼင်ႇမၼ်းယွၼ်းဝႆႉ ၸိုဝ်ႈ ၶမ်ႇပၼီႇ လႄႈ မၢႆၶမ်ႇပၼီႇ ဢၼ်တၢင်ႇၸိုဝ်ႈဝႆႉတီႈလူင်ပွင်ၸိုင်ႈယဝ်ႉ မၼ်းသူင်ႇၵႂႃႇတီႈ ဝႅပ်ႉသၢႆႉၵဵပ်းၶေႃႈမုၼ်းၶဝ် http://adci9.cc တီႈၼႆႈယဝ်ႉ။ ႁဝ်းၸႂ်ႉၾူၼ်းသင်သေၶဝ်ႈ မၢႆ Android Device ႁဝ်းဝႃႈႁိုဝ်ၸိူဝ်းၼႆႉ တေထတ်းတီႈဝႅပ်ႉၼႆႉယဝ်ႉ။ ဝႅပ်ႉၼႆႉလႆႈဝႃႈပဵၼ် Back-end တႃႇၵဵပ်ႉၶေႃႈမုၼ်းတီႈ ၵူၼ်းၸႂ်ႉဢႅပ်ႉၶဝ်ၼၼ်ႉယဝ်ႉ။

ဝၢႆးၼၼ်ႉ ဢႅပ်ႉမႅင်းၼၼ်ႉ တေယွၼ်းၶႂၢင်ႉတႃႇၸႂ်ႉ Accessibility Service ၼႆလႄႈ မၼ်းတေလၢတ်ႈဝႃႈ ဢဝ်ၸႅတ်ႈတူၺ်းသေလွင်ႈလွင်ႈၼႆသေ တေသူင်ႇၵႂႃႇတီႈၼႃႈ SettingActivity ယဝ်ႉၵႂႃႇတီႈ OpenService ႁႂ်ႈႁဝ်းပိူတ်ႇပၼ်ၶႂၢင်ႉမၼ်း တႃႇၸႂ်ႉ ဢတ်းၼႃႈၸေႃးၾူၼ်း တူၺ်း SMS ၸိူဝ်းၼႆႉယဝ်ႉ။ (ၶေႃႈၾၢင်ႉ။ ။ ယူႇယူႇၵေႃႈ ၾူၼ်းၸဝ်ႈၵဝ်ႇ ယွၼ်းၶႂၢင်ႉဢၼ်ၼၼ်ႉ ဢၼ်ၼႆႉၼႆၸိုင် လူဝ်ႇထတ်းတူၺ်းၼႂ်း ၾူၼ်းၸဝ်ႈၵဝ်ႇၵမ်းလဵဝ်)

ဝၢႆးသေႁဝ်းပၼ်ၶႂၢင်ႉမၼ်းယဝ်ႉ မၼ်းတေႁႂ်ႈႁဝ်း တူၺ်းၶဝ်ႈတူၺ်း ယွတ်ႈငိုၼ်းၼႂ်း App ပၢၼ်ႇ မိူၼ် Kplus, KungThai App ဢၼ်ႁဝ်းၸႂ်ႉဝႆႉၼၼ်ႉယဝ်ႉ။ မိူဝ်ႈႁဝ်းၶဝ်ႈၼႂ်းဢႅပ်ႉပၢၼ်ႇၼၼ်ႉ ၶဝ်ၵေႃႈတေႁၼ်ၸွမ်းႁဝ်း ၵွပ်ႈဝႃႈၶဝ်မီးၶႂၢင်ႉတူၺ်းလႆႈ ၼႃႈၸေႃးၾူၼ်းႁဝ်းယဝ်ႉ။ မၢႆလပ်ႉႁဝ်းဝႃႈႁိုဝ် မၢႆၾၢင်ႁဝ်းဝႃႈႁိုဝ် ငိုၼ်းႁဝ်းမီးၼႂ်းပၢၼ်ႇဝႆႉၵႃႈႁိုဝ် ၶဝ်ႁူႉမူတ်းယဝ်ႉ။

မၢႆတွင်း။ ။ မိူဝ်ႈလဵဝ် ဢႅပ်ႉပၢၼ်ႇၶဝ် ႁဵတ်း update မႃး ယႃႇႁႂ်ႈမၼ်းတူၺ်းလႆႈ မိူဝ်ႈသႂ်ႇမၢႆလပ်ႉ လႄႈ ႁဵတ်းႁေႉႁၢမ်ႈ ၼႂ်းၼိုင်ႈဝၼ်း ဢူၼ်းငိုၼ်းဢွၵ်ႇ လႆႈၵႃႈႁိုဝ် ပေႃးတေလႅၵ်ႈထႅင်ႈ ယွတ်ႈငိုၼ်းၸႂ်ႉၸၢႆႇၼႂ်းၼိုင်ႈဝၼ်းၸိုင် တေလႆႈႁဵတ်း Scan ၼႃႈ ၼေပႃးၼႆယဝ်ႉ။ ၼႆႉၵေႃႈထႅင်ႈလၢႆးၼိုင်ႈ တႃႇႁေႉႁၢမ်ႈ ယႃႇႁႂ်ႈထုၵ်ႇဢူၼ်းဢဝ်ငိုၼ်းလႆႈငၢႆႈငၢႆႈ။

ၼႆႉပဵၼ်ၶေႃႈတွပ်ႇ တီႈၶေႃႈထၢမ်ဢၼ်တင်းၼိူဝ်ၼၼ်ႉယဝ်ႉ။

ၸိုဝ်ႈ Packagename ဢၼ်ဝႃႈ com.xingchat.android မၼ်းၵႂႃႇမိူၼ်ဢႅပ်ႉဢၼ်ၼိုင်ႈ ဢၼ်မီးယူႇၼိူဝ် Play Store ပဵၼ် ဢႅပ်ႉ Social Live Broadcast Platform ဢၼ်ၼိုင်ႈယဝ်ႉ။ ပဵၼ်ၸိုဝ်ႈၶႄႇ 杏吧直播间 ဝႃႈၼႆယဝ်ႉ။

လၢႆးငိူင်ႉဝႄႈ

ပေႃးမီးပၼ်ႁႃၵေႃႈ တိုၼ်းမီးလွၵ်းလၢႆးၵႄႈၶႆ

မၼ်းၼႆ ၽူႈၶူင်သၢင်ႈၶဝ်ၵမ်ႈၼမ် တိုၼ်းယုမ်ႇယမ်ဝႆႉၼင်ႇၼႆယဝ်ႉ။ လွၵ်းလၢႆး ၼင်ႇႁိုဝ်ႁဝ်းတေ ဢမ်ႇပဵၼ်ယိူဝ်ႇၶၢမ်ႇတၢင်း ၶဝ်လၵ်ႉဢဝ်ငိုၼ်းႁဝ်းၼၼ်ႉ

1. ဢမ်ႇမီး လူင်ပွင်ၸိုင်ႈႁွင်ႈၵၢၼ်လႂ် သူင်လိၵ်ႈၸူးၵူၼ်းမိူင်း (မိူၼ်ၼင်ႇ ဝႃႈလူဝ်ႇသႂ်ႇၶွၼ်ႇၵႃးဝႃႇ သင်ဝႃႇ ၼႆၸိူဝ်းၼႆႉ)
2. ဢမ်ႇမီး ပၢၼ်ႇဢၼ်လႂ် ထၢမ်ၶေႃႈမုၼ်းၵူၼ်းၸႂ်ႉ လူၺ်ႈထူဝ်းၾူၼ်းမႃးသေ ထၢမ် (မိူၼ်ၼင်ႇ မၢႆၾၢင် လႄႈ မၢႆၾူၼ်း)
3. ပေႃးမီးလိၵ်ႈၶဝ်ႈမႃးၼႂ်းၾူၼ်း ယႃႇပေၼဵၵ်း Link ဢၼ်မႃးၼၼ်ႉသင် (သူင်ႇပၼ်တင်း Line ၵေႃႈယႃႇၼဵၵ်း)
4. ႁဵတ်း update ၾူၼ်းၸဝ်ႈၵဝ်ႇ ႁႂ်ႈပဵၼ် Android OS ၵမ်းလိုၼ်းသုတ်း မိူဝ်ႈလဵဝ် ပဵၼ် Android Version 13
5. ၼႂ်းၾူၼ်းၸဝ်ႈၵဝ်ႇ လူင်းတူဝ်ၶႃႈမႅင်း Anti-virus App ဝႆႉတႃႇသေႇ (မၢႆတွင်း။ ။ Anti-virus ဢမ်ႇႁူႉၸၵ်း မႅင်းတႃႇသေႃႇ)
6. မၢႆလပ်ႉ App ပၢၼ်ႇဢၼ်ၼိုင်ႈ လႄႈ ဢၼ်ၼိုင်ႈ ယႃႇသႂ်ႇမိူၼ်ၵၼ်
7. ယႃႇလူင်း App ၽၢႆႇၼွၵ်ႈ Play Store ( ဢူၼ်းဢႅပ်ႉပၼ်ၵၼ် တင်း Zapya ၵေႃႈ ယႃႇပေႁဵတ်းလႃးလႃး ၊ လူင်းဢႅပ်ႉ ဢၼ်မႃးတီႈ Play Store ၼၼ်ႉၵူၺ်း)

ၸိူဝ်းၼႆႉ ယုမ်ႇယမ်ဝႃႈ တေဝႄႈလွတ်ႈလႆႈ လွင်ႈပိူၼ်ႈလႅၼ်လၵ်ႉဢဝ်ငိုၼ်းယူႇယဝ်ႉ။

ႁူဝ်ႁုပ်ႈ

ႁဝ်းၶႃႈဢၼ်လႆႈဝႆႉၶၢဝ်းယၢမ်း ၶူၼ်ႉၶႂႃႉလဵပ်ႈႁဵၼ်းသေ မႃးပိုၼ်ၽေပၼ်ႁႂ်ႈသူၸဝ်ႈ လႆႈႁူႉဝႃႈ ငိုၼ်းႁဵတ်းႁိုဝ်ႁၢႆ ယဝ်ႉၵေႃႈ ၶဝ်ဢမ်ႇႁူႉမၢႆလပ်ႉႁဝ်း ၶဝ်ႁဵတ်းႁိုဝ်ဢဝ်ငိုၼ်းႁဝ်းၵႂႃႇလႆႈဢၼ်ဝႃႈၼၼ်ႉ ၶႃႈၶဝ်ယုမ်ႇယမ်ဝႃႈ မိူဝ်ႈလဵဝ်တေႉ သူၸဝ်ႈတေႁူႉပွင်ႇၸႂ်ၵၼ်ယဝ်ႉ။

ဢၼ်လႆႈထုၵ်ႇတၢင်း ၵူၼ်းလႅၼ်ၶဝ် လၵ်ႉငိုၼ်းၵႂႃႇၼၼ်ႉ 1) ပဵၼ်ၵွပ်ႈၸႂ်ၵူဝ် 2) ပဵၼ်ၵွပ်ႈၸႂ်လေႃးၽ ၸႂ်ၶႂ်ႈလႆႈ ၼႆ ၶႃႈၶဝ်ထတ်းႁၼ်ၼင်ႇၼၼ်ယဝ်ႉ။ မိူၼ်ၼင်ႇ ပေႃးလိၵ်ႈၶဝ်ႈမႃးဝႃႈ သူၸဝ်ႈ မီးသုၼ်ႇယိမ်ငိုၼ်းလႆႈ သုင်သုတ်း 1 သႅၼ်ဝၢတ်ႇ ဢမ်ႇလူဝ်ႇသဵင်ႈ ၶီႈငိုၼ်းသင် ၼႆ ၵမ်ႈၼမ် တေဢွၼ်ၵၼ်ယုမ်ႇသေ ၵပ်းသိုပ်ႇၶဝ် ၵမ်းလဵဝ်ယူႇယဝ်ႉ။ ၼႆႉပွင်ႇဝႃႈ ပဵၼ်ၵွပ်ႈၸႂ်လမ်ႇမၢၵ်ႈ လေႃးၽ။ ထႅင်ႈဢၼ်ၼိုင်ႈၵေႃႈ ပေႃးမီးလိၵ်ႈမႃး ဢမ်ႇၼၼ် သၢႆထူဝ်းမႃးဝႃႈ ႁဝ်းထုၵ်ႇၺႃးတၢမ်ႇ ဢမ်ႇၼၼ် လူဝ်ႇသႂ်ႇၶွၼ်ႇ ပေႃးဢမ်ႇသႂ်ႇမိူဝ်ႈၼႆႉ တေၺႃးတၢမ်ႇ ငိုၼ်းၵႃႈၼၼ်ႉ ၵႃႈၼၢႆႉၼႆ ၼႅတ်ႈယုမ်ႇသေ ႁဵတ်းၸွမ်း ၼႆႉၵေႃႈ ပဵၼ်ၵွပ်ႈၸႂ်ၵူဝ် လႄႈ ထုၵ်ႇၶဝ်လႅၼ်ၵႂႃႇယဝ်ႉ။

ၵွပ်ႈၼၼ် ၶေႃႈဢၼ်ၶႂ်ႈသင်ႇလၢတ်ႈတေႉ လိၵ်ႈသင်ၶဝ်ႈမႃးၵေႃႈ ၶိုၼ်းၵပ်းသိုပ်ႇတူၺ်းတီႈ ႁွင်ႈၵၢၼ်ၽၢႆႇၼၼ်ႉသေ ထၢမ်တူၺ်းလွင်ႈတၢင်းမၼ်းႁႂ်ႈတႅတ်ႈၼႅတ်ႈ ယဝ်ႉ ၸင်ႇယုမ်ႇတႃႉ။ ၽႂ်ထူဝ်းမႃးဝႃႈ တေလႆႈသႂ်ႇၸိူင်ႉၼၼ်ၸိူင်ႉၼႆၵေႃႈ ဝၢင်းသၢႆသေ ၶိုၼ်းထၢမ်တူၺ်း ဢၼ်ၵဵဝ်ႇၵပ်းလွင်ႈၼၼ်ႉသေ ၸင်ႇယုမ်ႇၶႃႈၼႃႈ။ ယွၼ်းႁႂ်ႈသူၸဝ်ႈ ပူၼ်ႉလွတ်ႈၽေးၶဵၼ် ၵူၼ်းလႅၼ်ငိုၼ်းသေၵမ်း။

ပႂ်ႉဢွၼ်ၵၼ်သိုပ်ႇဢၢၼ်ႇထႅင်ႈ တွၼ်ႈ 2 မၼ်းၶႃႈ

မႂ်ႇသုင်ၶႃႈ

ၸၢႆးတုမ်ႇၾႃႉ

ၵေႃႉလဵပ်ႈႁဵၼ်းလွင်ႈ လၢႆးလႅၼ်ငိုၼ်း

ဢၢင်ႈဢိင် ။ ။ Droidsans, Facebook Page PCTPOLICE