မႂ်ႇသုင် မိူဝ်ႈၼႆႉၶႃႈ တေမႃးသပ်းလႅင်းၼႄ လွင်ႈလႅၼ်ႈငိုၼ်းတီႈ KLFB Platform ၼၼ်ႉၼႆၶႃႈဢေႃႈ။

လွင်ႈႁႃငိုၼ်းဢၼ်ဝႃႈၼႆႉ သင်မၼ်းလႆႈငၢႆႈၼႆ လူၺ်ႈတီႈ ဢမ်ႇလူဝ်ႇႁဵတ်းသင်ၼႆ ၵမ်ႈၼမ် တိုၼ်းပဵၼ်လၢႆးလႅၼ်ယဝ်ႉ။ မိူၼ်ၼင်ႇ တီႈမိူင်းထႆး ၵေႃႈယၢမ်ႈမီးမႃးယူႇလၢႆလၢႆဢၼ် ၶႃႈတေဢဝ်လွင်ႈ Nice Review ဢၼ်ပဵၼ်တီႈမိူင်းထႆးၼၼ်ႉ မႃးၶႆႈၼႄသူၸဝ်ႈၶႃႈ။

Nice Review ၼႆႉ ၶႂ်ႈမိူၼ်ၵၼ်တင်း KLFB ၼႆႉၶႃႈယဝ်ႉ ပေႃးသႂ်ႇငိုၼ်းလူင်းတိုၼ်းၼိုင်ႈဢၵွင်ႉ 20,000 ဝၢတ်ႇ ယဝ်ႉတေလႆႈၶိုၼ်း ၼိုင်ႈဝၼ်း 200-300 oၢတ်ႇၼႆလႄႈ ဢွၼ်ၵၼ်ၶဝ်ႈလူင်းတိုၼ်းၼမ်ထူၼ်ႈယဝ်ႉ။ မိူဝ်ႈၼၼ်ႉ ဢူၺ်းၵေႃႉၶႃႈ ယင်းၸူဝ်းၶႃႈႁႂ်ႈၶဝ်ႈလူင်းတိုၼ်းယူႇ။ ၵူၺ်းၵႃႈ ၶႃႈဢမ်ႇၶဝ်ႈၸႂ်သေ ဢမ်ႇပဵၼ်လူင်းၸွမ်း။ သင်ဢမ်ႇ တေထုၵ်ႇလႅၼ်ၵႂႃႇၸိူင်ႉပိူၼ်ႈယူႇ။

ပေႃးၶဝ်ႈ Nice Review ယဝ်ႉ တေလႆႈႁဵတ်းၵၢၼ် ဢဝ်ဢၵွင်ႉ Facebook သေ တွပ်ႇ Comment ပိူၼ်ႈ ဢၼ်လိုၵ်ႉတီႈ Nice Review သေ သူင်ႇမႃးၼၼ်ႉ သင်ဢမ်ႇၵႂႃႇတွပ်ႇၸိုင် တေဢမ်ႇမီးငိုၼ်းၶဝ်ႈ ၼိုင်ႈဝၼ်း 200-300 ဝၢတ်ႇၼၼ်ႉယဝ်ႉ။ ၽွင်းၼၼ်ႉ ပိူၼ်ႈဢွၼ်ၵၼ်ႁႃသိုဝ်ႉ ဢၵွင်ႉ Facebook ၼမ်ထူၼ်ႈယဝ်ႉၶႃႈ။ ႁဵတ်းၼၼ်သေ ၶၢဝ်းတၢင်းတေႉ ၶႃႈၵေႃႈဢမ်ႇလႆႈတႅမ်ႈမၢႆဝႆႉလီလီ ဝၢႆးၼႆႉမႃး ၵူၼ်းႁဵတ်း Nice Review ၼၼ်ႉ လႅၼ်ဢဝ်ငိုၼ်းၵူၼ်းၸႂ်ႉ ၵႂႃႇဝႆႉတီႈလႂ်ၵေႃႈဢမ်ႇႁူႉ တေႃႇထိုင်မိူဝ်ႈ။ ၽႂ်ၵေႃႈ ဢမ်ႇထွၼ်ငိုၼ်းၶိုၼ်းလႆႈသေၵေႃႉ မိူၼ်ၼင်ႇ KLFB ၼႆႉယဝ်ႉ။ မီးပိူင်ပဵၼ်လၢႆလၢႆဢၼ် မိူၼ်ၼင်ႇ 3D Mining Pro, Bitcoin Trading ၼမ်ၼႃႇၶႃႈ ပေႃးသူၼ်ၸႂ် ၶဝ်ႁႃထွမ်ႇတီႈ ၶၢဝ်ႇလႆႈယူႇၶႃႈ။

ဢႅပ်ႉ KLFB Android App ပဵၼ်မႅင်း

ၶႃႈၶဝ် ဢဝ်ဢႅပ်ႉ KLFB ၵႂႃႇထတ်းတူၺ်းတီႈ virustotal ၼၼ်ႉ ႁၼ်ဝႃႈ ပႃးမႅင်းမႃးၼႆ တူၺ်းလႆႈၸွမ်းၼင်ႇ ႁၢင်ႈတႂ်ႈၼႆႉၶႃႈ။ Play Store ဢႅပ်ႉၶဝ် ၵႂႃႇတူၺ်းလႆႈတီႈၼႆႈၶႃႈ။

ဢၼ်ပဵၼ်မႅင်းၼႆႉ ၶဝ်ႈတူၺ်းလႆႈတီႈၼႆႈၶႃႈ။ ႁၢင်ႈတီႈတႂ်ႈၼႆႉ KLFB ဢႅပ်ႉ ယွၼ်းၶႂၢင်ႉ တႃႇၸႂ်ႉၵၢၼ် ၼမ်တေႉတေႉ။

ၼႆႉ မၢႆထိုင်ဝႃႈ ဝၢႆးသေလူင်းဢႅပ်ႉ KLFB ၼႂ်းၾူၼ်းယဝ်ႉၸိုင် ၶဝ်ထိင်းလႆႈၾူၼ်းႁဝ်းတင်းမူတ်းယဝ်ႉ။ ၵွပ်ႈဝႃႈ ဢၼ်ၶဝ်ယွၼ်းၶႂၢင်ႉၼၼ်ႉ တူၺ်းလႆႈမူတ်း မိူၼ်ၼင်ႇ Location ႁဝ်းယူႇတီႈလႂ်၊ Phone ႁဝ်းသိုပ်ႇၾူၼ်းၸူးၽႂ် ၵေႃႉလႂ် ၶၢဝ်းလႂ်၊ Photos/Media/Files ၼႆႉ ၶဝ်ႈတူၺ်းလႆႈ ၼႂ်းၾူၼ်းႁဝ်းမီးသင်လၢႆလၢႆ မိူၼ်ႁဝ်းၶဝ်ႈတူၺ်းတီႈ File Manager လႄႈ Photo Gallery ၼၼ်ႉယဝ်ႉ၊ Storage ၵေႃႈ တႅမ်ႈလႆႈ မွတ်ႇလႆႈ File ၶႅပ်းႁၢင်ႈၸိူဝ်းၼႆႉ၊ Camera ၼႆႉ လၵ်ႉထႆႇႁၢင်ႈ ထႆႇငဝ်းတူင်ႉ လႆႈမူတ်း ၸဝ်ႈၾူၼ်းဢမ်ႇႁူႉတူဝ်၊ Microphone ၼႆႉ လၵ်ႉဢတ်းသဵင် ႁဝ်းလၢတ်ႈသင်ၵၼ်ယူႇ ၸဵမ်ၸိူဝ်းၼႆႉ ၶဝ်ႈထိင်းလႆႈၾူၼ်းႁဝ်းမူတ်းမူတ်းယဝ်ႉ။

ၵွပ်ႈၼၼ် ငိုၼ်းႁၢႆၼႂ်း KPay ဢၼ်ဝႃႈၼၼ်ႉ ပဵၼ်ၵွပ်ႈဢႅပ်ႉၸိူဝ်းၼႆႉၼႆၵေႃႈ ဝႃႈလႆႈယဝ်ႉ။ ၵွပ်ႈဝႃႈ ၾူၼ်းႁဝ်းထုၵ်ႇသႂ်ႇ မႅင်းဝႆႉၸွမ်းလင်ႁဝ်းယူႇယဝ်ႉ။ Clip Video ၼင်ပူဝ်ႉ ႁူဝ်ႈၼၼ်ႉၵေႃႈ ပဵၼ်ယွၼ်ႉၼႆႉယဝ်ႉ။

ႁဝ်းလဵပ်ႈႁဵၼ်းတူၺ်း လွင်ႈဝႅပ်ႉၶဝ်

ၸိုဝ်ႈဝႅပ်ႉၶဝ်ၼႆႉ ၼင်ႇဢၼ်ႁႃလႆႈ မီးယူႇသွင်ဝႅပ်ႉ hxxps://klfb[.]club/my/historical-scores.html, hxxps://app[.]klfb.app/#/pages/login/login ၽၢင်ႁၢင်ႈတီႈတႂ်ႈၼႆႉ ပဵၼ်ၼႃႈဝႅပ်ႉၶဝ် ဢၼ်ပဵၼ်ဢႅပ်ႉၼႆႉယဝ်ႉ။

ႁၢင်ႈၽၢင်ထႅင်ႈဝႅပ်ႉ ဢၼ်ပဵၼ်လွင်ႈၶဝ် လႄႈ တႅမ်ႈဝႆႉႁႂ်ႈပိူၼ်ႈယုမ်ႇ မီး ၽိုၼ်လိၵ်ႈသင်သိင်ၸိူဝ်းၼႆႉၶႃႈ။

ပေႃးတူၺ်း Source Code ဝႅပ်ႉၶဝ်ၸိုင် ႁၼ်ပႃးလိၵ်ႈၶႄႇ မၢႆထိုင်ဝႃႈ ပဵၼ်ၶႄႇၵေႃႉၶူင်သၢင်ႈဝႆႉဝႅပ်ႉၼႆႉၼႆယဝ်ႉ။

ၶႃႈၶတ်းၸႂ်ႁႃ Server ၶဝ်ဝႆႉတီႈလႂ်ၼႆၵေႃႈ ႁႃပႆႇလႆႈ ၵွပ်ႈဝႃႈၶဝ်ၸႂ်ႉဝႆႉ Cloudflare သေ သိူင်ႇဝႆႉ IP Address မၼ်းၶႃႈယဝ်ႉ။

ၶေႃႈလူပ်းလင်

ၵၢၼ်သင်ၵေႃႈယဝ်ႉ ပေႃးလႆႈၼမ်ႉတွၼ်းမႃးငၢႆႈၼႃႇ ဢမ်ႇလူဝ်ႇႁဵတ်းသင်ၸိုင်် ၵမ်ႈၼမ်ပဵၼ်ဢၼ်လႅၼ်ၵူၺ်းၼႆ ယႃႇလိုမ်းၶႃႈ။ ၶူးၶမ်းလဵၵ်း ယၢမ်ႈလၢတ်ႈဝႃႈ

ၵၢၼ်ငၢႆႈၼႆႉ ဢမ်ႇမီး

မီးၵေႃႈဢမ်ႇပဵၼ်ၵၢၼ်

ၵွပ်ႈၼၼ် သင်ဢမ်ႇၶႂ်ႈထုၵ်ႇပိူၼ်ႈလႅၼ်ၸိုင် ယႃႇယုမ်ႇငၢႆႈ။ သင်ၵေႃႈယဝ်ႉ ဢၼ်လႆႈမႃးငၢႆႈငၢႆႈဢၼ်ဝႃႈၼၼ်ႉ ဢမ်ႇမီးၼႂ်းလုမ်ႈၾႃႉၼႆႉ ၶူးၶႃႈ ဢၼ်ယၢမ်ႈသင်ႇသွၼ်မႃး ဢမ်ႇမီးသင်လႆႈလၢႆ ၼႂ်းလုမ်ႈၾႃႉၼႆႉယဝ်ႉ။

လွၵ်းလၢႆး ဝႄႈလွတ်ႈလွင်ႈပိူၼ်ႈလႅၼ်

1. ယႃႇယုမ်ႇပိူၼ်ႈငၢႆႈ
2. လဵပ်ႈႁဵၼ်းလွင်ႈၼၼ်ႉလီလီ
3. ထတ်းသင်တူၺ်းလၢႆးႁဵတ်းၵၢၼ်ၶဝ် လႅပ်ႈပဵၼ်လႆႈ ဢမ်ႇပဵၼ်လႆႈ

ၸိူဝ်းၼႆႉသေ ႁႂ်ႈၵူႈၵေႃႉ ၵၢင်းလွတ်ႈလွင်ႈပိူၼ်ႈလႅၼ်သေၵမ်းၼႆ ယွၼ်းလိုဝ်ႈတီႈၼႆႈၶႃႈ။

ၶေႃႈမုၼ်း။ ။ ၵႅမ်မိူင်း ၸွႆႈႁႃပၼ်လႄႈ ယိၼ်းၸူမ်းၶွပ်ႈၸႂ်ထိုင်တေႉတေႉယူႇၶႃႈဢေႃႈ။

Source တင်းမူတ်း

hxxps://www.virustotal[.]com/gui/file/71b858fbdc8fc349c7b8219c899aabc7a9b0ecd57d5670c75454a21792bed908/detection

hxxps://play[.]google.com/store/apps/details?id=uni.UNIB752EA0&hl=en_US

hxxps://klfb[.]club/my/historical-scores.html

hxxps://app[.]klfb.app/#/pages/login/login

hxxps://6a467d92f6c7d45f[.]klfb.app/user-client/auth/captcha?os=1&model=PC&version=1.3.0&timestamp=1697808174769&tz=Asia%2FRangoon&lang=my&countryCode=KHM&phone=test&zone=1