မိူဝ်ႈဢွၼ်တၢင်း ၾူၼ်း Nokia ၼႆႉ ၽႂ်ဢမ်ႇႁူႉၸၵ်းဢမ်ႇမီး ၵွပ်ႈဝႃႈမၼ်းပဵၼ် ၾူၼ်းဢၼ်ၸိုဝ်ႈယႂ်ႇလိုဝ်းလင်ၶၢႆလီသေပိူၼ်ႈ ၼႂ်းလုမ်ႈၾႃႉၼႆႉၵွၼ်ႇၵေႃႈ ဝႃႈလႆႈယဝ်ႉ။ ၼႂ်းၶၢဝ်းတၢင်းပီ 1998-2007 ၼႆႉ ၾူၼ်း Nokia လႆႈၶၢႆလီသေပိူၼ်ႈ ဢမ်ႇပႆႇမီး ၸဝ်ႈလႂ်မႃးၶႄႉမၼ်းလႆႈ။ လႆႈဝႃႈ Nokia ပဵၼ်ၸဝ်ႈပေႃႈ ၾူၼ်းၼႂ်းပၢၼ်ၼၼ်ႉၵေႃႈ ဢမ်ႇၽိတ်း။
ဝၢႆးသေ ပီ 2007 မႃး ၾူၼ်း Nokia ဢမ်ႇပေႃးလႆႈၶၢႆၵႃႈႁိုဝ်ယဝ်ႉ။ ၵွပ်ႈဝႃႈ Steve Jobs ပိုၼ်ၽၢဝ်ႇ iPhone ဢၼ်ဝႃႈ Smart Phone ဢၼ်တေႉၼႆႉ ပဵၼ်ၸိူင်ႉႁိုဝ်။ ဢမ်ႇမီး ၼဵၼ် Keyboard ၊ ၼႃႈၾူၼ်း (ၼႃႈၸေႃးၾူၼ်း)ၵေႃႈ တဵမ်ၵႂၢင်ႈလိူဝ်သေၵူႈဢၼ် ၾူၼ်းတင်းလုၵ်ႈၼႆႉ တေႃႉတေႉမီးၼဵၼ်(Button) 4 ဢၼ်ၵူၺ်းလႄႈ ႁဵတ်းႁႂ်ႈ ၵူၼ်းတင်းလုမ်ႈၾႃႉ ဢွၼ်ၵၼ်မႃးသူၼ်ၸႂ်ၸႂ်ႉ iPhone ၵၼ်ယႂ်ႇၼမ်တေႉတေႉ။
မိူဝ်ႈၼၼ်ႉ Android OS ၵေႃႈ တႅမ်ႈယဝ်ႉယဝ်ႉၼင်ႇၵဝ်ႇ ၽိူဝ်ႇၶဝ်လႆႈမႃးၶဝ်ႈႁူမ်ႈ ပၢင်ပိုၼ်ၽၢဝ်ႇ iPhone ယဝ်ႉၸိုင် Android OS လႆႈၶိုၼ်းမႄးတႅမ်ႈမႂ်ႇ မူတ်းမူတ်းႁူဝ်တေႃႇႁၢင်ႁႂ်ႈၶိုတ်းလႆႈ iPhone။ ယိူင်ႈဢဝ် iPhone မိူၼ်ၼင်ႇ Scroll Action, Touch Screen, On Screen keyboard ၸဵမ်ၸိူဝ်းၼႆႉယဝ်ႉ။
ၵွပ်ႈပိူဝ်ႈ iPhone၊ Android OS မႃးႁႅင်းလႄႈ ႁဵတ်းႁႂ်ႈၾူၼ်း Nokia ဢၼ်ယၢမ်ႈၶၢႆလီၼၼ်ႉၵေႃႈ ဢမ်ႇၶၢႆလီသေဢမ်ႇၵႃး Nokia ၼႆႉ ဢမ်ႇယွမ်းၵႂႃႇၸႂ်ႉ OS တၢင်ႇဢၼ် မၼ်းၶႃၵေႇသေ ၸႂ်ႉ Symbian OS မၼ်းႁင်းၵူၺ်းယူႇတိၵ်းတိၵ်းလႄႈ ႁဵတ်းႁႂ်ႈၵူၼ်းသူၼ်ၸႂ်ၸႂ်ႉ ၾူၼ်းၶဝ်ဢမ်ႇမီး။ ဝၢႆးၼၼ်ႉၵေႃႈ ၾူၼ်း Nokia ၼႆႉ လႆႈထုၵ်ႇ Microsoft သိုဝ်ႉဢဝ်ၵႂႃႇသေ သႂ်ႇ Windows Phone OS မႃး ဢၢၼ်းၶႄႉ iPhone ၵမ်းသိုဝ်ႈယဝ်ႉ။ ၵူၺ်းဢမ်ႇၶႅမ်ႉလႅပ်ႈသေ ႁဵတ်းႁႂ်ႈ Nokia တူၵ်းၸူမ်ႁၢႆဝႆႉ ၼႂ်းၵၢပ်ႈပၢၼ်မိူဝ်ႈလဵဝ် လုၵ်ႉတီႈ ၸဝ်ႈပေႃႈၾူၼ်းမၢႆၼိုင်ႈ ၼႂ်းလုမ်ႈၾႃႉသေ ပဵၼ်ၵႂႃႇပိူၼ်ႈဢမ်ႇႁူႉၸၵ်းပႅတ်ႈယဝ်ႉ။
မၢႆတွင်း။ ။ သင်ဝႃႈ ႁဝ်းထုၵ်ႇလီလႅၵ်ႈလၢႆႈတႃႇၶိုၼ်ႈယႂ်ႇမႂ်ႇသုင်ၼႆၸိုင် ထုၵ်ႇလီလႅၵ်ႈလၢႆႈၵမ်းလဵဝ်ယူႇ။ ပေႃးဢမ်ႇလႅၵ်ႈၸွမ်းၵၢပ်ႈပၢၼ်မၼ်းၸိုင် ၸဝ်ႈၵဝ်ႇတေတူၵ်းလိုၼ်းၸူမ်ႁၢႆဝႆႉ မိူၼ်ၼင်ႇ ၾူၼ်း Nokia ၵူၺ်းယဝ်ႉၼႆ ႁႂ်ႈဢဝ်ႁဵတ်းတွၼ်ႈသွၼ်တႃႉ။
Reference: Google, ChatGPT